തിങ്കളാഴ്ച നല്ല ദിവസം എന്ന് പറയാറുണ്ട്‌ ..എന്നാല്‍ ഈ കഴിഞ്ഞ തിങ്കളാഴ്ച അത്ര നന്നല്ലായിരുന്നു ...എനിക്ക് .
എന്റെ കിഡ്നി എടുക്കാം എന്നും.. അങ്ങനെ വളരെ പെട്ടന്ന് തന്നെ ട്രാന്‍സ്പ്ലാന്റ് സര്‍ജറി ചെയ്യാം എന്നും ഒക്കെ കരുതി ഇരിക്കുകയായിരുന്നു . അപ്പോഴാണ്‌ ഡോക്ടര്‍ കിഷോര്‍ ബാബു വിധി എഴുതിയത് ..
" ജോസ് യു ആര് ഹൈപ്പര്‍ടെന്‍സീവ് . യു കനോട്ട് ബീ എ ഡോണര്‍ "
ഒരു കിഡ്നി എടുത്തു കഴിഞ്ഞു എനിക്ക് B.P കൂടിയാല്‍ പിന്നെ പ്രശ്നമാണത്രേ . രണ്ടു മൂന്നു പ്രാവശ്യം നോക്കിയപ്പോള്‍ ഒക്കെ എന്റെ പ്രെഷര്‍ 140 ന് മുകളില്‍ ആയിരുന്നത്രെ . പിന്നെ പാരമ്പര്യമായി പ്രമേഹവും ഉള്ളതിനാല്‍ തീര്‍ത്തും എന്നെ ഡോണര്‍ ആകാന്‍ സമ്മതിച്ചില്ല .
പണ്ടൊക്കെ വൃക്ക തകരാറിലായി , ട്രാന്‍സ്പ്ലാന്റ് ചെയ്യാന്‍ പോകുന്നു , ഡയാലിസിസ് ചെയ്യാന്‍ പോകുന്നു എന്നൊക്കെ കേള്‍ക്കുമ്പോള്‍ അതൊക്കെ വെറും വാര്‍ത്തകള്‍ ആയിട്ടേ എനിക്ക് തോന്നിയിട്ടുള്ളൂ . ശാസ്ത്രത്തിന്റെ കഴിവുകളെക്കുറിച്ച് ഓര്‍ത്ത് അപ്പോള്‍ ഞാന്‍ അഭിമാനിച്ചിട്ടുണ്ട്
ഇപ്പോഴോ... ഇതിന്റെയൊക്കെ ഗൌരവം നന്നായി മനസ്സിലായി.. .ഞാന്‍ ആവശ്യക്കാരന്‍ ആയതിനാല്‍ ആവും ..
ഇനി കിഡ്നിക്കായി എവിടെ പോകും? ഡോണര്‍ ആവാം എന്ന് സ്വമനസ്സാലെ സമ്മതിച്ച എന്റെ ചേട്ടനെക്കുറിച്ച് ആലോചിക്കുമ്പോള്‍ അഭിമാനവും വിഷമവും തോന്നും. അനിയന്റെ ഭാര്യക്ക് വേണ്ടി വൃക്ക ദാനം ചെയ്യാനുള്ള മനസ്സ് ..അതിനെ ഞാന്‍ എന്ത് പറഞ്ഞാണ് വിശേഷിപ്പിക്കുക .
അതെ സമയം... പാരമ്പര്യമായി എനിക്ക് വരാന്‍ സാധ്യത ഉള്ള പ്രമേഹവും, രക്ത സമ്മര്‍ദ്ദവും , ചേട്ടനും വന്നൂടെ?. അത് അറിഞ്ഞു കൊണ്ട് ഞാന്‍ അതെങ്ങനെയാണ്‌ സ്വീകരിക്കുക ? തീരുമാനം എടുക്കാന്‍ പ്രയാസം തന്നെ .
അങ്ങനെ വന്നപ്പോള്‍ പിന്നെയുള്ള സാധ്യതകള്‍ രണ്ടാണ് ..
വേറെ ആരെങ്കിലും വൃക്ക നല്‍കാന്‍ തയ്യാറായാലോ? എവിടെ നിന്ന് ? ആര് തരും? ? ആരെ സമീപിച്ചാലാണ് അതിനുള്ള വഴി തുറന്നു കിട്ടുക? ഇതൊന്നും എനിക്കറിയില്ല ..
പിന്നെ ഉള്ള ഒരു സാധ്യത ...കാഡവര്‍ ഡോണര്‍ ആണ് . അതിനു ആശുപത്രിയില്‍ പേര് രജിസ്റ്റ്ര്‍ ചെയ്യണം. പിന്നെ എത്ര നാള്‍ കാത്തിരുന്നാലാണ് നമ്മുടെ അവസരം വരുന്നത് എന്ന് പറയാനാവില്ല . അതുവരെ കാത്തിരുന്നേ പറ്റൂ .
അപ്പോള്‍ ഞാന്‍ ഓര്‍ത്തു. ...കാഡവര്‍ കിഡ്നി കിട്ടുന്ന എല്ലാവര്ക്കും വേണ്ടി ആരോ എവിടെയോ മരിച്ചല്ലേ പറ്റൂ .. ഒരാളുടെ നഷ്ടം മറ്റൊരാളുടെ ലാഭം .. ഒരാള്‍ക്ക്‌ ജീവന്‍ പോകുമ്പോള്‍ , അതിലൂടെ മറ്റൊരാള്‍ക്ക് ജീവന്‍ തിരികെ കിട്ടുന്നു . വിശദീകരിക്കാനാവാത്ത വൈകാരികതകളുടെ ഒരു കേളികൊട്ടല്ലേ ഇതൊക്കെ?
ഞാന്‍ രക്ത സമ്മര്‍ദ്ദ രോഗിയായി മുദ്ര കുത്തപ്പെട്ട സ്ഥിതിക്ക് .. ഇനി എവിടുന്ന് കിഡ്നി കിട്ടും ...? ഒരിടത്തു നിന്നും കിട്ടിയില്ലെങ്കിലും എന്റെതുണ്ടല്ലോ എന്ന ഒരാശ്വാസം ഉണ്ടായിരുന്നു. ഇപ്പോള്‍ അതില്ല
എവിടുന്നു കിട്ടും ഒരു വൃക്ക ?
അതിപ്പോള്‍ ഒരു ഉത്തരം കിട്ടാത്ത ചോദ്യമായി കണ്മുന്‍പില്‍ കിടന്നു കറങ്ങുന്നു ..
വിഷമം വീര്‍പ്പു മുട്ടിക്കുമ്പോള്‍ ..ഒരു പുസ്തകത്തില്‍ വായിച്ച വാചകം ഓര്‍മ്മ വരുന്നു.
"This too shall pass" .വളരെ അര്‍ത്ഥവത്തായ ഒരു വാചകം. എല്ലാം നൈമിഷികമായവ എന്ന പരമാര്‍ത്ഥം ആ നാല് വാക്കുകളില്‍ ഉണ്ട് .
തീര്‍ച്ചയായും ഈ വിഷമ സന്ധി മാറുമായിരിക്കും... മാറും...മാറണം. എവിടുന്നെങ്കിലും ഒരു കിഡ്നി എന്റെ പ്രിയ സഖിക്കായി കിട്ടും.
കിട്ടുമായിരിക്കും അല്ലെ? .. അങ്ങനെ തന്നെ ഞാന്‍ വിശ്വസിക്കട്ടെ ..
ജോസ്
ബാംഗ്ലൂര്‍
18- മാര്‍ച്ച്‌ -2010
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ