വിരസമായ ഒരു ഞായറാഴ്ച ദിവസം.. പതിവ് പോലുള്ള ഉറക്കത്തിനു പിടി കൊടുക്കാതെ , രാവിലെ എണീറ്റ്‌ കുളിച്ചു , പത്രം വായന ഒക്കെ കഴിഞ്ഞിരിക്കുന്ന സമയം..
T.V ഓണ്‍ ചെയ്തു ചാനലുകള്‍ മാറ്റിക്കളിച്ച് സമയം കളഞ്ഞപ്പോഴാണ് ഏതോ ഒരു ചാനലില്‍ വളരെ നൊസ്റ്റാല്ജിക് ആയ ഒരു പാടു കേട്ടത്. കഴിഞ്ഞ വര്‍ഷം ഇറങ്ങിയ ഒരു മലയാള സിനിമയിലെ - ഓര്‍ക്കുക വല്ലപ്പോഴും " - ഒരു ഗാനം. ആദ്യം കേട്ടപ്പൊള്‍ തന്നെ വല്ലാതെ മനസ്സില്‍ തട്ടി. ഉടനെ തന്നെ കംപ്യുട്ടര്‍ ഓണ്‍ ചെയ്തു ആ പാട്ട് യു ട്യുബില്‍ പരത്തി നോക്കി. അതില്‍ കിട്ടാത്ത സംഭവം വല്ലതും ഉണ്ടോ? ഉടനെ ആ പാട്ട് ഡൌണ്‍ ലോഡ് ചെയ്തു കുറെ പ്രാവശ്യം കേട്ടു. അപ്പോള്‍ തോന്നി, ഈയിടെ കേട്ട കുറെ നല്ല പാട്ടുകള്‍ കൂടി ഡൌണ്‍ ലോഡ് ചെയ്താലോ എന്ന്.
"എനിക്ക് പാടാനൊരു പാട്ടിലുണ്ടൊരു പെണ്ണ് " എന്ന മനോഹരമായ ഗാനം പല തവണ കേട്ടതാണ്. ഞാന്‍ യു ട്യുബില്‍ അതൊന്നു തപ്പി നോക്കി. കിട്ടുകയും ചെയ്തു. അത് ഡൌണ്‍ ലോഡ് ചെയ്തുകൊണ്ടിരിക്കവേ, ആ വെബ് പേജില്‍ പലരും എഴുതിയ കമന്റുകള്‍ ഞാന്‍ വെറുതെ വായിച്ചു.
അതില്‍നിന്നും ആണ് ആ മനോഹര ഗാനം പാടിയ യുവ ഗായകന്‍ സൈനോജ് , കഴിഞ്ഞ നവംബറില്‍ , ലുക്കീമിയ ബാധിച്ചു മരിച്ച വിവരം അറിഞ്ഞത്.
പിന്നെ കുറെ നേരം ആ പാട്ട് ആവര്‍ത്തിച്ചു കേട്ടു. സൈനോജിനെ ക്കുറിച്ചുള്ള വാര്‍ത്തകളും നെറ്റില്‍ നിന്നും വായിച്ചു. മനോഹരമായ സ്വരം കൊണ്ട് അനുഗ്രഹീതനായ യുവ പ്രതിഭ .. ഒരൊറ്റ പാട്ടുകൊണ്ട് തന്നെ പല മനസ്സുകളെയും കീഴടക്കിയ ശേഷം ...ആ പ്രതിഭ അകാലത്തില്‍ പൊലിഞ്ഞു. .
ഒരു സോപ്പ് കുമിള പോലെ നൈമിഷികം ആണ് ജീവിതം എന്ന കാര്യം സ്ഥിരീകരിക്കുന്ന തരത്തിലായി ആ മരണം എന്ന് തോന്നി. പ്രശസ്തിയുടെ കൊടുമുടിയിലേക്ക് നടന്നു കയറവേ.. പ്രതീക്ഷിക്കാതെ എത്തിയ മരണം ..ആ യുവ ഗായകന്റെ ജീവിതം കവര്‍ന്നെടുത്തു.
ഈ ഗായകനെക്കുറിച്ചു വളരെ അധികം ഒന്നും എനിക്കറിയില്ല.. പക്ഷെ അയാള്‍ പാടിയ ആ ഗാനം ഞാനുള്‍പ്പെടെയുള്ള പലരുടെയും മനസ്സില്‍ എക്കാലവും കാണും.
സ്വര്‍ഗത്തിലിരുന്നു ..നിങ്ങളുടെ പാട്ട്, പലവട്ടം പലരും പാടുന്നത് കേട്ട് സന്തോഷിക്കൂ സൈനോജ് ..
നിങ്ങളുടെ ആത്മാവിനു ഈശ്വരന്‍ ശാന്തി നല്‍കട്ടെ.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ